網頁引言： 政府「持續進修基金」(CEF) 提供高達$25,000資助，用嚟考電單車牌，聽落係咪好吸引？輝Sir經常收到查詢，問CEF學車係咪真係咁「著數」。
俗語有云：「邊有咁大隻蛤乸隨街跳」。雖然現時CEF已涵蓋電單車課程（只限指定駕駛學院），但當中嘅「魔鬼細節」你又知幾多？今日，輝Sir就同你逐點拆解，計清楚條數，等你唔會因為誤解而「上錯船」！
1. 金錢迷思：係咪政府出晒錢，自己唔使俾？
答案：梗係唔係！ 你唔單止要自己俾一部分，仲有好多「隱藏費用」！
- 你要先俾錢，後Claim錢： 你需要先繳付課程全額學費，成功完成整個課程（包括所有額外考試）後，先可以向政府申請發還資助。
- 政府只資助部分學費： 以一個$12,000嘅「電單車駕駛證書課程」為例，政府會資助你課程首$10,000嘅80%（即$8,000），同埋餘下$2,000嘅60%（即$1,200），總共資助$9,600。你自己要俾$2,400。
- 大量「額外費用」唔包喺CEF：
- 運輸署考試費用 (路票)：$510
- 學習駕駛執照 (學牌)：$548
- 強制、路試租車考試費：$1,460
- 未計補鐘，淨係呢啲雜費加埋已經要 $2,518！
總結計一計： 你要先俾$14,518（$12,000學費 + $2,518雜費），最後順利Claim返$9,600，實際上自己都要俾$4,918。呢個價錢，同搵輝Sir團隊學，享受更個人化、更靈活嘅教學，其實相差無幾。
2. 課程要求：考嘅嘢比正常多，練習時間反而更少？
答案：係！ 要Claim錢，就要跟足佢哋嘅遊戲規則。
- 額外考試同課程： 除咗要Pass運輸署嘅筆試、強制試同路試，你仲要額外上理論課、長途駕駛實習課，並且要考多兩個內部試：「畢業駕駛考試」同「畢業筆試」，全部合格先算完成課程。
- 實際練習時間有限： 一個號稱有32節課嘅CEF課程，聽落好似好多。但拆解後你會發現，當中好多係理論課、隨車觀察、甚至坐私家車「考線透視」。真正俾你坐上電單車練習強制試同路試嘅時間，可能只得26小時，當中仲要有一半係自練課堂，導師指導時間極少！
- 想補鐘？全無資助： 練習時間唔夠？想補鐘就要自己「課金」，導師堂每節$600起，費用不菲。
3. 靈活性：完全冇！轉場、轉師傅、轉車牌都唔得！
答案：冇錯！ 報咗CEF課程，你就被「綁死」喺同一間駕駛學院。
- 唔可以轉場/轉師傅： 如果覺得考場唔適合自己，或者同導師唔夾，你都冇得轉。
- 唔可以轉考其他車牌： 例如你報咗Van仔，覺得太難想轉考私家車，係唔可以嘅。
- 想中途放棄？學費凍過水： 如果你想中途退款，就算得，扣除各種行政費同已上課堂嘅「正價」費用後，你預付嘅學費應該都所剩無幾。
4. 出席率要求：走堂會Claim唔到錢？
答案：係！ CEF課程對出席率有嚴格要求，駕駛實習課同理論課嘅出席率都要達到70%。如果唔達標，就算你所有試合格，都一樣Claim唔到錢。
5. 肥佬風險：重考費用極高，仲要冇資助？
答案：完全正確！ 呢個係最大嘅伏位！
- CEF完全唔包重考費用： CEF只資助你第一次考試嘅費用。萬一不幸肥佬，所有重考費用都要自己俾。
- 重考費用極度昂貴： 喺駕駛學院重考，一個包含幾節堂嘅重考套餐，閒閒地都五千幾蚊。
- 焗住要繼續幫襯： 因為你一定要喺同一間駕院考到合格，先可以完成成個課程去Claim錢。呢種「洗濕咗個頭」嘅情況，令你冇得選擇，只能硬食佢哋昂貴嘅重考費用。
【輝Sir重要提醒】 「一日你未完成個課程同考試合格，一日你都要繼續在駕院學，直到合格！否則Claim不到錢！轉考其他車牌、轉學校、轉場、放棄等等，你就真金白銀冇咗萬幾元，但又考唔到牌。」
總結：CEF學車，真係啱你嗎？
總括嚟講，以為用CEF學車有著數，但計清楚之後，你會發現：
- 隱藏收費多，實際自付額唔平。
- 額外要求多，要花更多時間精神去應付額外課堂同考試。
- 真正練習時間少，導師指導時間更少。
- 缺乏彈性，一旦開始就冇得返轉頭。
- 重考成本極高，風險巨大。
輝Sir電單車：一個更靈活、更個人化嘅選擇
如果你希望有一個專業、有耐性嘅導師團隊全程照顧你嘅學習進度，唔想被合約束縛，想自由選擇上堂時間同練習次數，輝Sir電單車嘅課程絕對更適合你。我哋著重教學質素，目標係令你用最合理嘅時間同金錢，真正學識安全駕駛，輕鬆考到牌。
想了解更多輝Sir課程嘅詳情？立即聯絡我哋，等我哋團隊為你提供免費1對1諮詢！